Здружението на правници Роми од Скопје ќе поднесе кривична пријава против непознат сторител заради малтретирање и претепување малолетник во инцидентот што во неделата вечерта се случи во населбата Трајаново Трло во Кочани.
Од Здружението истакнуваат дека е документиран случајот со физичката пресметка во која 10-годишно дете од ромска националност било задржано и претепано од неколку повозрасни и непознати лица.
– Во јавноста дополнително излезе видео на кое се гледа како лица, на кои не може да им се утврди идентитетот, му нанесуваат тешки физички повреди на малолетник кој наводно влегол во двор од семејна куќа во обид да изврши кражба. Видеото е испратено и до Министерство за внатрешни работи. Здружението на правници Роми најостро ги осудува физичките напади врз малолетни лица мотивирани од предрасуди со етничка димензија, вклучително и овој случај каде жртва на насилство е дете на кое му е потребна итна психо-социјална поддршка и ресоцијализација заради нормално функционирање и правилен развој, се истакнува во писмениот допис од Здружението на правници Роми.
Од Здружението бараат надлежните институции итно да го расветлат и да му дадат разрешница на случајот, а до медиумите апелираат за соодветно информирање на јавноста, согласно етичките вредности и принципи од Кодексот на новинарите.
МИА