Европската агенција за лекови денес на јавноста се обиде да даде одговор на некои нејаснотии поврзани со вакцината „АстраЗенека“, откако поради случаи со згрутчувања на крвта британско-шведската компанија го запре тестирањето на анти-ковид вакцината и дополнително го подгреа анти-вакс расположението кај одреден дел од популацијата во екот на пандемијата.
Од ЕМА соопштија дека самата вакцина била подложна на различни анализи во колаборација со експерти на полето и дека постојат можности за несакани последици и нус-појави, но тие се многу ретки. Следствено на тоа, уверуваат дека бенефитите од „АстраЗенека“ се далеку поголеми одошто потенцијалните аномалии.
-Ние тоа што го направивме со вакцината го направивме многу внимателно. Дискутиравме со различни експерти на полето и донесовме заклучок дека постојат можности за несакани ефекти од вакцинацијата со „АстраЗенека“. Внимателно ги анализиравме ризиците кои навистина се многу ретки, изјави д-р Сабина Штраус од Европската агенција за лекови.
Згрутчувањето на крвта, односно тромбоза на церебрален венски синус се појави кај луѓе од 60-годишна возраст, најчесто жени, а бројката на ваквите нус-појави е приближно 45 лица. И покрај тоа, од ЕМА убедени се дека вакцината на „АстраЗенека“ има превентивна природа и го штити здравјето на луѓето од Ковид-19.
-Ние имаме многу вакцини што во ЕУ земјите се покажуваат како ефективни. Ќе повториме уште еднаш, имаме идентификувано многу ретки случаи на нус-појави, но тие не треба да бидат пречка за употребата на вакцината затоа што таа може да донесе само бенефит. На каков начин се употребуваат и користат вакцините и те како зависи од различни земји и системи, велат од ЕМА.
Со оглед на тоа дека исклучоците не го потврдуваат правилото, ЕМА донесе одлука сепак да не ја ограничи употребата на вакцината „АстраЗенека“ на европско тло.
д.ј