Македонија играше и создаваше шанси, Романија истите ги конвертираше во голови. Впечатокот е единствен дека репрезентацијата на Македонија на „Националната Арена“ во Букурешт беше и повеќе од рамноправен противник против подмладената и амбициозна селекција на Романија. Избраниците на Ангеловски покажаа дека неслучајно во јуни ќе заиграат помеѓу елитата на Европското првенство 2020.
Шанса за „лекување на раните“ утре од 20:45 на „Градски“ во Скопје, македонската селекција ќе добие против стариот добар познаник, кој асоцира само на убави фудбалски времиња и достигнувања, Лихтенштајн.
Ако некоја репрезентација ни лежи повеќе од останатите, тогаш дефинитивно тоа е репрезентацијата на Лихтенштајн. Во девет претходни соочувања, во различни квалификациони циклуси, Македонија има скор од осум победи и еден нерешен резултат, со вкупна гол разлика од 33:5. Највисоката победа на македонската репрезентација во историјата е токму против утрешниот опонент на гостински терен, 1:11 во 1996 година.
