Министерството за економија објави три јавни повици во рамки на Програмата за конкурентност и иновации и претприемништво (КИП) за 2021 година наменети за поддршка на домашните компании. Како што информира министерот за економија Крешник Бектеши на својот Фејсбук профил, објавени се јавните повици за субвенционирање на микро и мали претпријатија, за финансиска поддршка на женско претприемништво и за субвенционирање на занаетчии.
Тој ги повика сите микро и мали компании, занаетчии и жени претприемачи да ја искористат финансиската поддршка што им ја нуди Министерството за економија.
Со јавниот повик за субвенционирање на микро и мали претпријатија е предвидена финансиска поддршка за субвенционирање на 50 отсто од докажаните трошоци за набавка на машини и алати и за фотоволтаични панели. За оваа намена се предвидени вкупно 30,7 милиони денари, додека финансиската поддршка по еден апликант не може да надмине 400.000 денари. Доколку фирмата е управувана или основана од жена, тогаш субвенцијата се зголемува за 10 отсто. Крајниот рок за аплицирање е 16 април годинава, а јавниот повик може да се најде на линкот: https://www.economy.gov.mk/doc/2916 .
Со јавниот повик за субвенции за поддршка на женско претприемништво предвидена е финансиска поддршка за кофинансирање на 80 отсто од трошоците на компании кои се во 50-отстотна сопственост или управувани од жени за набавка на опрема и алати, уредување/подобрување на деловниот простор и воведување на софтверски решенија. За оваа програма во рамки на Буџетот на Министерството за економија се предвидени вкупно 4 милиони денари, а максималниот износ на поддршка по апликант е 400.000 денари. Крајниот рок за аплицирање е 30 април годинава, а јавниот повик може се најде на линкот: https://www.economy.gov.mk/doc/2917 .
Со јавниот повик за субвенции за занаетчии предвидена е финансиска поддршка за покривање на 60 отсто од трошоците на занаетчиите за набавка на опрема и алати како и уредување, односно подобрување на деловниот простор. Максималниот износ на поддршка за еден апликант изнесува 120.000 денари за трошоци направени во 2020 и 2021 година. Крајниот рок за аплицирање за овој јавен повик е 30 април годинава, а јавниот повик може да се најде на линкот: https://www.economy.gov.mk/doc/2915 .
Како што информираат од Министерството за економија, годинава првпат за распределба на средствата предвидени во јавните повици од Програмата за конкурентност, иновации и претприемништво ќе се применува начелото за рамномерен регионален развој. Тоа, како што посочуваат, значи дека средствата ќе се распределуваат според развиеноста на планските региони во државата.вј/дма/