Јавното обвинителство не доволно ги заштитува жртвите на родово засновано насилство. Со оглед на тоа што Обвинителството е клучен орган на прогон на сторителите на кривичните дела, постапките за насилство врз жени и девојки не се водат доволно стручно и професионално, вели Јана Коцевска од Платформата за родова еднаквост, мрежа од здруженија кои работат на унапредување на родовата еднаквост и организаторки на протестите за случајот „Јавна соба”. Тие упатија конкретни барања до ЈО со рок за нивно реализирање до 8 –ми Март.
„Кривичен прогон на сторителите од случајот „Јавна соба“ и за полнолетните жртви во случајот, а не само за делото „производство и дистрибуција на детска порнографија“; – Обвинителни акти против сторителите од „Јавна соба“ за делата „злоупотреба на лични податоци“, „посредување во вршење проституција“, „загрозување на безбедноста“ или „ширење на расистички и ксенофобичен материјал по пат на компјутерски систем“, зависно од околностите на случајот, доследно, квалитетно и навремено спроведување на предистражни и инстражни постапки во случаите на насилство врз жени, засилена контрола над работата на обвинителите во случајот „Јавна соба“ и изрекување на санкции согласно закон, започнување на процес на засилена контрола над работата на обвинителите кои работат на постапки на насилство врз жени, донесување, фактична и доследна примена на внатрешна акти со кои ќе се прецизираат обврските и начинот на постапување на јавните обвинители во случаите на родовозасновано насилство, во согласност со Законот за спречување и заштита од насилство врз жени и семејно насилство и Конвенцијата на Советот на Европа за спречување и борба против насилството врз жените и семејното насилство(Истанбулска конвенција)“, вели Коцевска.
Доколку ЈО не ги исполни нивните барања до најавениот рок 8 –ми Март, од Платформата за родова еднаквост велат дека нема да престанат да го адресираат прашањето во јавноста и ќе продолжат со протести.
Г.Д