Европската Унија и Светската здравствена организација (СЗО) започнуваат проект вреден седум милиони евра за вакцинација на населението на западен Балкан, соопшти денеска Европската Комисија.
-Со овој нов проект за поддршка на кампањите за вакцинација на западен Балкан, во партнерство со СЗО, ЕУ продолжува да ги исполнува своите ветувања за поддршка на нашите партнери во справувањето со пандемијата. Овој проект го надополнува пакетот од 70 милиони евра за пристап до вакцини за регионот, изјави еврокомесарот за проширување, Оливер Вархеји.
Целта на овој нов проект на ЕУ и СЗО е да ги подготви земјите од регионот за ефикасен прием и администрација на вакцините против Ковид-19, кои ќе пристигнат преку Ковакс или преку механизмот на ЕУ за споделување на вакцините.
Европската Унија се надева со оваа иницијатива исто така да ја помогне ефикасноста на здравствените системи во регионот “преку придвижување кон одржливо финансирање на универзално здравствено осигирување“.