Денеска во Собранието со 76 гласа „за“ и еден „воздржан“ беа изгласани законските измени со кои пратениците ќе добиваат понизок износ на патни трошоци.
Со законските измени наместо досега утврдените до 30 проценти по изминат километар од продажната цена на еден литар гориво за возилото кое се користи, пратениците ќе добиваат надомест до 20 проценти по изминат километар од продажната цена на еден литар гориво за возилото кое се користи.
Согласно измените на Законот, на пратениците им се овозможува и надомест за закупнина на стан во Скопје. Конкретно, на пратениците кои живеат подалеку од 100 километри од Собранието, им се остава и можноста за закуп на стан, со право на надомест за само четири патувања месечно од и до нивното место на живеење, за да може да контактираат со гласачите.
Пред гласањето, пратничката Лилјана Затуроска од ВМРО-ДПМНЕ посочи дека и со измените и дополнувањата на Законот повторно се злоупотребува европското знаменце, но додаде дека пратениците од нејзината пратеничка група ќе го поддржат бидејќи им биле прифатени амандманите со кои, како што кажа, се излегува во пресрет на такси превозниците. Во реплика Диме Велковски од СДСМ наведе дека со измените само се врши усогласување со европската легислатива.