Комисијата за заразни болести вели дека здравствената ситуација со ковид-19 е стабилна, но ризикот не е намален. Во текот на вчерашниот ден беа регистрирани нови 302 случаи, а Комисијата на вчерашниот состанок остана на ставот дека мерките за заштита од вирусот треба да останат исти. Комисијата препорача работата во државна и јавна администрација, општините и судовите, согласно принципот на работа и работниот процес, да продолжи да се одвива во смени или онлајн од дома или, пак редуцирано со систем на ротации зависно од карактеристиките на работниот процес на институциите и да не се менува работното време на угостителските објекти и тие да продолжат да работат до 21 часот.
Министерот за здравство, Венко Филипче вчера првпат оствари средба со новоназначениот амбасадор на Јапонија, Хиронори Савада на која дискутираа за актуелната ситуација со пандемијата со ковид-19 во државава и во Јапонија, за долгогодишната успешна соработка меѓу двете држави, како и за потпишувањето на договорот меѓу Амбасадата на Јапонија и Универзитетска Клиника за инфективни болести и фебрилни состојби на 4 февруари.
Според вчерашната статистика на Министерството за здравство, во претходното деноноќие се направени 2024 тестирања при што се регистрирани 302 нови случаи на Ковид-19, починати се десет лица, а 444 пациенти оздравеле.
Вкупниот број на позитивни и суспектни пациенти кои се лекуваат на инфективните оддели во болниците во државата е 599, од кои 254 пациенти се лекуваат во Скопје. Во моментов, на територијата на цела држава во ковид-центрите има 560 празни кревети. Сите клинички одделенија располагаат со болнички места до кои има довод на кислород, а доколку е потребно Министерството за здравство дополнително ќе ги прошири одделенијата.
Од почетокот на пандемијата до денес, во Северна Македонија се регистрирани вкупно 92 193 лица позитивни на коронавирусот, од нив оздравени се 80 837 лица, а починати се 2 841 лице. Во моментов бројот на активни случаи изнесува 8 515.
Лидерот на ВМРО-ДПМНЕ, Христијан Мицкоски синоќа во интервју за Канал 5 телевизија оцени дека земјава се уште се соочува со пандемијата и секојдневно бележи бројки кои што не се за занемарување, што укажуваа на фактот дека ни се неопходни вакцини.
СДСМ пак потсети дека имунизацијата во земјава ќе почне во февруари, нагласувајќи дека Владата и министерот за здравство Филипче вакцини набавуваат по три механизми – Ковакс, во директни преговори со производителите и преку солидарниот фонд на ЕУ. Партијата нагласи и дека пациентите во државата ќе имаат можност да користат најсовремена и најскапа терапија т.н. моноклони антитела, специфична за корона вирусот.
Во својот прв извештај, Европската агенција за лекови потврди дека досега собраните податоци за употребата на вакцината во ЕУ се во согласност со познатиот безбедносен профил и оти не се идентификувани нови несакани ефекти. Како што веќе е познато, најчестите несакани ефекти што вакцинираните луѓе не ги чуствуваат, вообичаено се благи или умерени и исчезнуваат неколку дена по вакцинирањето.
Европска Унија не ја исклучи можноста и руската вакцина „Спутник V” да биде одобрена во Европа, а се работи и на овозможување на нејзино производство. Шефот на германскиот институт „Пол Ерлих истакна дека е потребно одобрување дека вакцината ги исполнува стандардите.
МИА