Гостиварската полиција попладнево прекинала свадбена свечност во селото Врапчиште која се организирала пред семејна куќа. Во полициска станица бил приведен сопственикот и ќе се соочи со кривична пријава.
Од СВР Тетово информираа дека околу 15 часот и 40 минути, полициски службеници на СВРТетово-ОВР Гостивар го лишиле од слобода А. З. (56) од гостиварско Врапчиште.
– Пред неговата куќа била организирана свадбена свеченост, на која присуствувале триесетина лица кои ги забавувал музички оркестар. Тој бил задржан во Полициската станица Гостивар, вели Марјан Јосифоски портпарол на СВР Тетово
На местото е извршен увид и по целосно расчистување и документирање на случајот против А.З. ќе биде изготвен поднесок по член 206 од Кривичниот законик, а поради сомнение дека сторил кривично дело-непостапување според здравствени прописи за време на епидемија.
Во последниот апел на СВР Тетово до угостителите во полошкиот регион беше посочено на доследно почитување на најновите владини мерки и воздржување од организација на свадбени и други свечености или прослави.
– Во спротивно најригорозно ќе бидат санкционирани сите прекршувања на мерките, особено во случаи кога ќе биде констатирано групно собирање во објекти за најразлични поводи. Непочитувањето на мерките од угостители или поединци-организатори на семејни прослави ќе се третира кривично и дека нема да се толерираат никакви отстапувања од предвиденото со, нагласува Јосифоски.
Апелот доаѓа во период кога во овој период од годината во родниот крај доаѓаат иселениците и се организираат веселби. Ова, дотолку повеќе што на ова подрачје наскоро претстои доаѓање на времено вработени во странство, кои обично во овој период од годината претходно организираа свадбени свечености или приредуваа други семејни собирања.
Изминатава недела во гостиварско од слобода беа лишени три лица, кои во нивните локали примале гости по работното време и правеле забави за гостите.
з.г.м.