Во англискиот град Бирмингем, најмалку едно лице е убиено утрово, а седум лица се повредени, од кои две потешко, кога непознат маж излетал на улица и ги нападнал со нож, соопшти полицијата.
Главниот надзорник Стив Грам од полицијата на Западен Мидлендс изјавил дека полицајците сè уште бараат мотив, но дека нема индикации дека нападот со нож е поврзан со тероризам или банда.
Полицијата потврди дека еден маж е убиен, а две лица, маж и жена, имаат сериозни повреди. Уште пет лица беа повредени, а нивните повреди беа опишани како полесни.
„Потврдуваме дека, по синоќешните инциденти, започнавме истрага за убиството“, соопштија од локалната полиција, пренесува „Ројтерс“.
Не е пронајдена врска меѓу жртвите, што ја натера полицијата да верува дека нападот бил извршен по случаен избор.
Како што беше претходно соопштено, полицијата добила повик половина час по полноќ и веднаш излегла на терен со екипите на Итната медицинска помош.