Делчевските штркови кои поради близината на Брегалница, се се побројни во водите на реката, ја започнаа потрагата по нови живеалишта. Едно од нив е и споменикот на паднатите броци каде во минатото немаше гнездо, но во последните денови се видливи гранките од нивниот нов дом над врвот од споменикот. За граѓаните, штрковите носат среќа и е убаво што го прошируваат своето живеалиште.
– Штрковите обично во Делчево живеат во едно од најголемите гнезда во источниот регион, а тоа е над градската пошта. Деновиве и јас забележав дека над споменикот на паднатите борци тие градат ново гнездо. Штркот е симбол за среќа и затоа моја лична желба е гнездото со годините да биде што поголемо, вели жител на Делчево.
Денес овој птичји вид беше забележан и во водите на река Брегалница каде во речното корито, семејство штркови бараа храна и се разладуваа од летните горештини. За посетителите во блиските кафе-барови покрај реката, беше вистинска милина да се гледа нивната игра во водата.
– Често сме овде заради дечињата кои сакаат да ги гледаат додека се хранат. Во реката имаат храна во изобилство, така што сигурно им годи и да се разладуваат, велат посетителите на блиските барови покрај Кејот.
Нивото на реката кое поради сушата е доста ниско, деновиве на штрковите им ја олеснува потрагата по храна на штрковите, потрага која како што додадоа граѓаните, ќе биде се почеста на Кејот на Брегалница во Делчево.
МИА