Компанијата „Макпрогрес Виница“, која оваа година прославува 30 години од постоењето, како лидер во индустријата за кондиторски производи својата работа ја базира на постојана иновација и континуиран развој на вработените. Во таа насока, оваа година „Макпрогрес“ започна со проект за основање на тренинг центар за обуки кој ќе служи за потребите на компанијата, но исто така и на бизнис професионалците од регионот. Тренинг центарот, кој ќе овозможи градење на менаџерските капацитети, како и специјализирани обуки за вработените во „Макпрогрес“, се очекува да почне со работа оваа есен.
„Во рамките на тренинг центарот планираме да воведеме модерна лабораторија за истражување и развој за прехрамбените технологии во пекарската и кондиторската индустрија, технолошко следење и аналитика, развој на нови производи, анализа на постоечки и нови сировини, како и тест проби со процесна опрема. Ќе развиваме соработка со научни институции, средни училишта, старт-ап компании, итн. Во рамки на центарот ќе постои и креативен кампус со ко-воркинг околина за промовирање на иновации со неколку сектори: креативна кујна, оддел за продажба, дел за маркетинг, дизајн и креирање амбалажа, мехатроника, сензорика и технологија“, изјави Извршниот директор на Макпрогрес, Глигор Цветанов.
Проектот е финансиран од Владата на Јапонија преку Фондот за Соработка со Европската банка за обнова и развој.
,,ЕБОР полага особено внимание на улогата на приватниот сектор во насока на развој на вештини, имајќи во предвид дека компаниите се најдобро поставени да ги идентификуваат вештините потребни за нивните вработени да бидат продуктивни и да постигнат најдобри резултати. Она што е особено вредно за внимание е фактот дека успешна компанија како „Макпрогрес“ се вклучува во обуки за потребите на пошироката заедница и за останатите компании кои се лоцирани во регионот. Ние сме многу среќни што можеме да ја поддржиме оваа значајна иницијатива“, рече Анди Аранитаси, Претставник на ЕБОР во Скопје.
Македонската менаџмент консалтинг платформа за експертска поддршка, ПримеПоинт Партнерс, е избрана за целосно спроведување на овој проект во делот на креирање на брендот, дефинирање на програмите, утврдување на содржината и динамиката на предавања, селекција на професори/обучувачи, обука на обучувачите, спроведување на програмите, упис и селекција на кандидати, план за одржливост, мониторинг и евалуација, итн.
“Нам ни претставува особена чест да работиме со визионерскиот тим на Макпрогрес во создавање на иновативен тренинг центар кој ќе овозможи градење на вештините и одржлив развој за Источна Македонија“, изјави Билјана Марковиќ Стаменова, партнер и извршен директор на ПримеПоинт Партнерс.
