На последното собрание на ДФРМ (друштво на филмски работници ) едногласно се донесе одлука во врска со овогодинешното издание на филмскиот фестивал “Браќа Манаки” дека истото нема да може да има традиционално издание со гости и со програма како изминатите 40 негови изданија, со оглед на фактот дека големи филмски фестивали од “А” категорија како Кан, Карлови Вари, Локарно и други беа откажани, како и со оглед на објективните состојби и последици предизвикани од пандемијата. Она за што се согласни филмските работници е дека формата на одбележување на овогодинешното издание на фестивалот “Браќа Манаки”, треба да кореспондира со вредноста на фестивалот и заради тоа ќе се вложи креативна енергија и напор истата да се зачува.
На собранието беше изгласан староновиот директор Гена Теодосиевска. Одлучено било фестивалот заедно со ДФРМ да изнајдат начин за достоинствено одбележување на 41.то издание на “Браќа Манаки”, кој е наш најголем и најзначаен филмски фестивал, како и можноста за инволвираност на неговиот домаќин во “новото нормално”, градот Битола.