Гоце Седлоски, љубимецот на загрепската публика, повторно се враќа на Максимир, овој пат да го води Б-тимот на „Динамо“, пишува „Спортске новости“, а пренесуваат и други хрватски медиуми.
„Да, станувам тренер на вториот тим на ’Динамо’ и веднаш ќе кажам, многу сум среќен и горд што се враќам на Максимир. Но, во целата приказна има еден голем проблем. Не знам како да дојдам во Загреб поради мерките за коронавирусот“, рекол Седлоски.
Гоце Седлоски (46) е еден од најдобрите фудбалери во Македонија воопшто. Во Хрватска играше за двата најлути ривали – „Хајдук“ и „Динамо“. Дресот на сплиќани го носеше од 1995 до 1997 година, па замина во „Шефилд“, од каде што во 1999 година дојде во „Динамо“. Многу брзо стана миленик на навивачите, а набрзо стана и капитен на екипата. Со „Динамо“ освојуваше трофеи – три првенства, три купа и два суперкупа. Посебно му беше импресивна сезоната 2003/2004, кога како стопер даде дури 20 голови за „сините“ на домашни и меѓународни натпревари, објавуваат хрватските медиуми.