Општина Гевгелија соопшти дека на граничниот премин Богородица на македонско-грчката граница патничкиот сообраќај е целосно прекинат, а во земјата се пропуштаат само наши државјани со кои се врши интервју од страна на граничните полицајци и волонтери на Црвениот крст и кои потпишуваат изјави за самоизолација доколку доаѓаат од високо и средно ризични земји.
Товарниот сообраќај се одвива без проблеми, со напомена дека грчката гранична полиција ја известила нашата дека од 21 до 5 часот наутро ќе биде забранет влез на товарни возила во нашата земја.
Од страна на Центарот за јавно здравје-ПЕ Гевгелија сите објекти и кабини на граничниот премин Богородица се дезинфекционирани, ќе бидат дезинфицирани и другите државни објекти и установи, а во соработка со ЈПКД„Комуналец“ ќе биде организирана и акција за дезинфекција на сообраќајниците во градот.
Во Прифатниот центар за мигранти „Винојуг“ минимален е бројот на мигранти, кои по краткиот престој се враќаат назад. Истовремено, засилена е контролата за спречување на илегалните преминувања на мигранти преку границата.