Со проширувањето на „Корона“ вирусот во земјите членки на ЕУ, Германија, Италија, Холандија и Франција и зголемување на стапката на заразеност, почна да опаѓа и реализацијата на транспорти за овие држави. По воведувањето на карантин во некои држави и региони, откажани се речиси 90 отсто од договорените транспорти, а тоа значи огромни загуби за камионџиите, но и за буџетот на земјава, вели Страшо Јованов од независниот синдикат на камионски транспортери на Македонија.
-Jaс сликовито ќе кажам дека во Македонија има 10 000 регистрирани камионски единици. Од 4000 камионски единици кои сообраќаат со овие дестинации во Западна Европа и во просек за еден месец реализираат најминимално. Еден транспорт до европските дестинации и еден транспорт до Турција. Тие два круга кога ќе се затворат, минималната реализација е 5000 евра.
Во градежништвото ситуацијата нималку не се различна. Стекнатите услови во овој сектор воопшто не помагаат на работниците во заштитата од вирусот Ковид-19, напротив, само ги влошуваат состојбите. Недостатокот на информации кои допираат до нив и неможноста конвелнционално да се информираат поради природата на нивната работа, според Атанас Трајковски од независниот синдикат на градежни работници, инженери и трговци во градежништвото, претставува уште еден проблем.
-Условите на градилиште не се добри за да може работникот да се заштити од вирусот. Има само една чешма и тука луѓето можат да ги измијат рацете, меѓутоа нема средства за хигиена, а работниците се во меѓусебен контакт, користат едно метро, еден ист алат.
Синдикатите апелираат за посериозен однос и третман на институциите по однос на овие прашања.