Неофицијално, обезбено е мноизинство за донесување на новиот Предлог закон за јавното обвинителство, што ќе го поддржат Независната пратеничка група од ВМРО ДПМНЕ и Коалицијата за подобра Македонија ќе даде поддршка за законот за јавното обвинителство. Во соопштение до медиумите наведуваат дека во законот се вградени нивни ставови. Апелираат до ВМРО ДПМНЕ да даде конструктивни и издржани амандмани кои заедно ќе ги поддржат и во интерес на граѓаните да се донесе законско решение во духот на градењето доверба во создавањето правна држава и ќе се поддржат евроатланските процеси.
– Во насока на постигнување на консензус по однос на понуденото законско решение за законот за Јавно обвинителство, како и одржаната јавна расправа по однос на истиот, а со цел донесување на закон кој треба да ги почитува принципите на независност, владеење на правото, почитување на правата на обвинетите, осудените и оштетените во кривична постапка, ние како Независна пратеничка група од ВМРО ДПМНЕ и Коалицијата за подобра Македонија, ги застапувавме следните ставови. Еве што постигнавме:
1. Јавниот обвинител кој ќе раководи со Основното јавно обвинителство за гонење на организиран криминал и корупција да биде избран со непосредно гласање на сите обвинители
2. После завршената академија обвинителите да мора 3 години да бидат во основни обвинителства
3. Ја дефиниравме дисциплинската постапка како не би можела да биде злоупотребена
4. Јавното обвинителство повеќе не може да заснова обвинение врз основа на незаконски прислушкувани материјали
5. Согласно забелешките на сите присутни експерти на јавната расправа во однос на преносот на надлежностите од СЈО во ОЈО, а во духот на времениот карактер за кој СЈО беше формирано, предложивме преземање на предметите од јавните обвинителства согласно надлежностите утврдени со овој закон
6. Обвинението за случаите Талир 1 и Талир 2 поднесени после законскиот рок се обвиненија во кои отпаѓаат незаконски прислушкуваните материјали, и со тоа ја исправаме неправдата, односно даваме фер шанса сега без незаконски прислушкуваните материјали да ја докажат невиноста и неаргументираноста за постоење на овие случаи
7. Предложивме уништување на незаконски прислушкуваните материјали, на прецизен начин, јасно опишано во овој закон
8. Го прецизиравме рокот за конечно одлучување по жалби
9. Собранието на Република Северна Македонија до отпочнување на примената на овој закон (30.06.2020) ќе го усогласи кривичното законодавство со европските стандарди при што во преодните одредби ќе ги наведе броевите на членовите од новиот закон кои кореспондираат во членовите од кривичниот законик, се наведува во соопштението од Независна ПГ на ВМРО-ДПМНЕ
Посочуваат дека нивните искрени намери во овој период беа да се изнајде решение со кое ќе се обезбеди функционирањето на принципот на владеењето на правото согласно европските вредности и со цел да се оневозможи реваншизам а да се овозможи правда.
– Апелираме ВМРО ДПМНЕ да даде конструктивни и издржани амандмани кои заедно ќе ги поддржиме и во интерес на граѓаните да донесеме законско решение во духот на градењето доверба во создавањето правна држава и дополнително заедно да и помогнеме на нашата држава во евроатланските процеси, се вели во соопштението од независната ПГ на ВМРО-ДПМНЕ и Коалицијата за подобра Македонија, соопштија од Независната пратеничка група на ВМРО ДПМНЕ.
Неофицијално, оваа група е дел од мнозинството, кое ќе го поддржи предлог законот за јавно обинителство, кој вечерва е на седница на влада. Пред одржувањето на седницата, се огласи лидерот на СДСМ, Зоран Заев:
Вечерва е постигната доволно добра основа за да почне процедурата за носење Закон за јавно обвинителство. Очекувам Владата вечерва да заседава и да го усвои предлог-текстот на Законот за кој постигнавме широка политичка согласност. После усвојувањето од страна на Владата, Законот треба да оди во Собранието на Република Северна Македонија, каде по скратена постапка, се надевам дека ќе добие поддршка од најмалку 2/3 од пратениците, напиша вечерва на Фејсбук лидерот на СДСМ и доскорашен премиер Зоран Заев.
– Усвојувањето на овој закон ќе биде голем придонес кон нашата европска интеграција и аргумент плус за Европската Унија да донесе позитивни одлуки поврзани со почетокот на преговорите на Република Северна Македонија за членство во Унијата. Она што е особено важно за сите наши граѓани, Законот ги овозможува неопходните услови за владеење на правото во нашата земја и за конечна и темелна изградба на правната држава.
Низ разговорите, кон содржината на Предлог-законот беа вградени и голем дел од предлозите на ВМРО-ДПМНЕ, за кои се застапуваше и се избори Независната пратеничка група на ВМРО-ДПМНЕ и Коалицијата за подобра Македонија, со што се изнајде решение со кое ќе се обезбеди функционирањето на принципот на владеењето на правото согласно европските вредности и со што се создаваат услови да се овозможи фер и еднаквост на страните во постапките, а со крајна цел да се овозможи правда.
Законот гарантира дека сите судски процеси кои произлегуваат од СЈО ќе добијат своја правна разрешница пред надлежните судови, низ професионална и фер постапка, базирана на докази. Она што ни беше една од основните цели, го обезбедивме – во законот нема скриена амнестија, секој за кој постои обвинение ќе си одговара пред институциите!
Упатувам голема благодарност до Европската Унија, до САД и до Државниот јавен обвинител за нивните напори и за помошта при дефинирањето на содржината на овој Предлог-закон за јавно обвинителство. Им благодарам и на сите пратеници и сите експерти кои дадоа свој придонес и ги повикувам сите политички сили во земјата да го поддржат законското решение, за уште еднаш заедно да го потврдиме европскиот пат на нашата земја и заедно да ја потврдиме нашата стратешка определба за обезбедување правна држава, напиша Заев на Фејсбук.