Андреј Ал-Асади вечерва со почеток од 20 часот во МКЦ ќе го промовира својот трет поетски ракопис „Небесна геометрија“. Овој ракопис се надоврзува на неговата претходна книга, а новата пак, изобилува со поетски слики што ги напаѓаат читателските сетила.
„Книгата содржи свежи, неизлитени метафори, мислата патува во сфери од човековата свест до кои ретко се стигнува, таа комуницира со древни знаења, а она што е напишано во песните е очигледно доживеано некаде во внатрешните светови на лирскиот субјект и тоа ги прави веродостојни и привлечни за читателот. Ако му се пристапи херменевтички на овој ракопис, во него ќе се откријат референции кон источната филозофија, онаа далекуисточната, индиската, но и референции кон арапската култура“, оценува филологот, Ѓоко Здравески.
Инаку, Андреј Ал-Асади е роден 1996 година, во Лондон. Дипломирал на Економскиот факултет при Универзитетот „Св. Кирил и Методиј“ во Скопје.
Автор е на стихозбирките „Midnight Blues” (2014) и „Под дервишовото сиќе“ (2018). За збирката раскази „Друго минато“ во 2018 година ја добива наградата за дебитантски прозен ракопис „Новите“. Учествувал на повеќе поетски читања меѓу кои и на Струшките вечери на поезијата.