Секторот за внатрешни работи Тетово апелира до возачите посебно при движење во планинските предели повеќе да се внимава поради дождовите и промената на условите за сообраќај. Со оглед дека коловозите се влажни и лизгави, што се должи и на правта наталожена на истите од долготрајниот сушен период, неопходна е максимална внимателност, особено во доцните вечерни и раните утрински часови, кога на одредени места има и магла и кога се присутни пониски температури од дневните, велат од СВР Тетово.
Секторот за внатрешни работи Тетово апелира да возачите да ја прилагодат брзината на возилата според условите на патот и посебно оние кои се движат кон Стража, Маврово, Попова Шапка или по долината на Радика, каде се можни и одрони од камења. На возачите им се советува, исто така, редовно да ја провeруваат техничката исправност на возилата и пред се на сопирачките и уредите за управување, да не престигнуваат на непрегледни места и да не седнуваат зад волан под дејство на алкохол, без положен возачки испит или без придружник, доколку станува збор за возачи-почетници.
Полицијата потсетува и дека продолжуваат секојдневните контролни активности на подрачјето како и дека законски ќе ги санкционира сите прекршоци со мандатни или други поднесоци, зависно од видот на констатираниот прекршок.